ناوه‌ڕۆك
وشەی ڕاگه‌یاندن
وشه‌ی ڕاگه‌یاندن له‌بنه‌ڕه‌تدا له وشه‌ی (communis)ـی لاتینیه‌وه وه‌رگیراوه كه‌به‌واتای بڵاو یان باو دێت، بنچینه‌ی پرۆسه‌ی ڕاگه‌یاندنیش هێنانه‌دی گشتگری و هاوبه‌شیه (communness)، ئه‌مه‌ش هه‌رگیز نایه‌ته‌دی، ئه‌گه‌ر لایه‌نی كه‌م جۆره لێك تێگه‌یشتنێك له‌نێوان بواری ئه‌زموون و شاره‌زایی نێره‌ر و وه‌رگردا نه‌بێت كه ببێته هۆی تێگه‌یه‌شتنێكی هاوبه‌ش و چوونیه‌ك له واتای په‌یامی په‌یوه‌ندی كردنه‌كه‌ی نێوانیان و بوونه هۆی تێگه‌یشتنێكی بونیادنراو له‌سه‌ر گۆڕینه‌وه‌ی زانیاری و شاره‌زایی و كارامه‌یی له نێوان هه‌ردوو لایه‌نی پرۆسه‌ی ڕاگه‌یاندندا.
پێناسەکانی ڕاگەیاندن
(كارل هوفلاند) به‌مجۆره پێناسه‌ی ڕاگه‌یاندن ده‌كات:
- پرۆسه‌یه‌كه كه‌تیایدا تاك (نێره‌ر) ئاگاداركه‌ره‌وه‌یه‌ك (هێمای زمانه‌وانی، یان جووله، یاخود ئاماژه) دنێرێ – ڕه‌وان ده‌كات - تاڕه‌فتاری تاكه‌كان (وه‌رگره‌كان) هه‌موار بكات.
(جۆرج لندبرج) ڕاگه‌یاندن به‌وه پێناسه ده‌كات:
- كارێكه به‌هۆی هێماوه.
(باغی) به‌مجۆره پێناسه‌ی ڕاگه‌یاندن ده‌كات:
- پرۆسه‌یه‌كی ئامانجداری گواستنه‌وه‌ی زانیارییه‌كانه له كه‌سێكه‌وه بۆ كه‌سێكتر، به‌مه‌به‌ستی له‌یه‌كتر گه‌یشتنیان.
به‌مجۆره‌ش پێناسه‌ی ڕاگه‌یاندن كراوه:
- پرۆسه‌یه‌كه كه به‌هۆیه‌وه واتا و زانیاری و بیر و بۆچوون له‌كه‌سێكه‌وه ده‌گوازرێته‌وه بۆ كه‌سێكی تر، واته له (نێره‌ر) وه بۆ (وه‌رگر) به‌مه‌به‌ستی هێنانه‌دی ئامانجی ویستراو.
